10 طرق لمواجهه الألم النفسي لفقد ما نحب
بقلم أ.د. عمرو حسن الحسني أستاذ المخ و الأعصاب جامعة القاهرة
#بوست_الجمعة النهاردة عن إزاي نواجه أصعب أزمة أو أصعب إختبار خلال الفترة دي.
ألا و هو إختبار "الفقد" ..!
الكل خايف من الفقد ..فقد أهل أو أحباب أو أصحاب ..فقد صحة.. فقد فلوس و مشاريع ..فقد الحياة 😔
لما تفكر هتلاقي معظم إبتلاءات ربنا لينا تتمحور حول في "الفقد"
و عشان كده ربنا قال "وَلَنَبْلُوَنَّكُم بِشَيْءٍ مِّنَ الْخَوْفِ وَالْجُوعِ وَنَقْصٍ مِّنَ الْأَمْوَالِ وَالْأَنفُسِ وَالثَّمَرَاتِ ۗ"
هحاول معاكم أستجمع كل أساليب الاستعداد و التأهب لمواجهة الفقد
و قبل ما تفتكروا إني "سبع البرمبه" في مواجهة الفقد .. أحب أقولكم إن من أبرز مشاكلي مع نفسي إني
Very bad loser
أو شخص بيهتز جدا من فقد الأشياء و الأشخاص.. و علي مدار سنين طويله و أنا بأحاول أعالج ده مع نفسي .. فممكن أشارككم بعض من أفكاري الفلسفية اللوذعيه اللي ساعات بتساعدني علي مواجهة "الفقد" ..
١- الفكرة الأولي: النعم اللي ربنا بينعم علينا بيها هي منح و ليست حقوق و لا مسلمات .. هي حقوق انتفاع .. و لكنها ليست ملكك .. حتي فلوسك مش بتاعتك.. أنت مجرد مستأمن عليها "وَأَنفِقُوا مِمَّا جَعَلَكُم مُّسْتَخْلَفِينَ فِيهِ ۖ" .. حتي أرضك و بيوتك مش بتاعتك "إِنَّ الْأَرْضَ لِلَّهِ يُورِثُهَا مَن يَشَاءُ مِنْ عِبَادِهِ".. من حقك تزعل عشان راحت بس متزعلش أوي يعني .. مش بتاعتك أصلا .. حاجة ربنا و استردها منك و هو لا يسأل عما يفعل.
٢- الفكرة التانيه: ربنا أنعم عليك ب ٤٣٥٦٧٥٤٤ نعمة (رقم إفتراضي يعني.. محدش يحاول يقراه😂) .. كل يوم الصبح تصحي تلاقيهم
لسه زي ما هما ٤٣٥٦٧٥٤٤ نعمة مخسوش و لا واحدة.. كل يوم نفس الحاجه .. يعدي عليك ١٨٥٠٠ يوم و هما بيزيدوا مش بيقلوا .. قوم لما في اليوم ١٨٥٠١ لقيتهم نقصوا واحدة و لا اتنين .. تقوم تقفش و تقول مش لاعب .. و الله عيب بجد .. من حقك تزعل بس متزعلش أوي يعني.
٣- الفكرة التالتة: مشكلتنا دايما "طول الأمل" ..و عاوزين منفقدش حاجة عشان الحياة طويلة و صعبه و عايزين كل حاجه تفضل مكملة معانا ..يا إخواننا الدنيا قصيرة جدا ... هي ممر و ليست مقر .. أكيد لازم تزعل إنك فقدت حبيب أو قريب أو صاحب.. بس متزعلش أوي .. مسافة السكة و ستلحق به و تتقابلا في دار النعيم مخلدين بإذن الله .. 😍
٤- الفكرة الرابعة: دايما بأتخيل الدنيا و كأنها لعبة "بنك الحظ" بتاعت زمان ..أحداث و فلوس و بلاد بتعدي عليها .. الخرطوم و صنعاء و بيروت و الدار البيضاء 😉 و بلاد تشتريها و أحكام بالسجن و أحكام علي صحابك ..و في الاخر الموضوع لعبة ..كل حاجه فيها مش حقيقيه .. هي الدنيا كدة .. كلة لعب .. (اعْلَمُوا أَنَّمَا الْحَيَاةُ الدُّنْيَا لَعِبٌ وَلَهْوٌ وَزِينَةٌ وَتَفَاخُرٌ بَيْنَكُمْ وَتَكَاثُرٌ فِي الْأَمْوَالِ وَالْأَوْلَادِ كَمَثَلِ غَيْثٍ أَعْجَبَ الْكُفَّارَ نَبَاتُهُ ثُمَّ يَهِيجُ فَتَرَاهُ مُصْفَرًّا ثُمَّ يَكُونُ حُطَامًا ۖ وَفِي الْآخِرَةِ عَذَابٌ شَدِيدٌ وَمَغْفِرَةٌ مِّنَ اللَّهِ وَرِضْوَانٌ ۚ وَمَا الْحَيَاةُ الدُّنْيَا إِلَّا مَتَاعُ الْغُرُورِ ) .. عشان كدة لازم تقفل دور بنك الحظ و تقوم تشوف المهام الحقيقيه اللي وراك.. أعمال الخير .. هي دي اللي هتكمل معاك للآخرة.
٥- الفكرة الخامسة: فكرة عقائدية بحته .. لما حد يسألك ايه أغلي حاجه في حياتك ..؟ متقولش أبويا و لا أمي.. و لا الواد حمؤة ابني بأموت فيه الكلب ده ..👶 و لا زوجي قرة عيني..😃 ولا روقة مراتي دي مقدرش أعيش من غيرها ..💑 .. و لا النيش و طقم الصيني🍽🍽🍽😂
صحيح كلهم غاليين جدا جدا جدا مفيش كلام و أغلي من عنينا...بس أغلي حاجة عندك لازم تبقي دينك و ربك .. دي الحقيقه و الله .. و بالتالي مادمت لم تصب في دينك .. فأنت مازلت بخير... و الأدلة كتير بس مثلا ..امتثال سيدنا إبراهيم لذبح ولده إرضاء لربه .. ده مش بس كده .. ده انت حبك لربك يخليك متتحملش حتي اللي يعادوه حتي لو ابوك أو ابنك (لا تَجِدُ قَوْمًا يُؤْمِنُونَ بِاللَّهِ وَالْيَوْمِ الْآخِرِ يُوَادُّونَ مَنْ حَادَّ اللَّهَ وَرَسُولَهُ وَلَوْ كَانُوا آبَاءَهُمْ أَوْ أَبْنَاءَهُمْ أَوْ إِخْوَانَهُمْ أَوْ عَشِيرَتَهُمْ)
٦- الفكرة السادسة: ( قُلْ إِنَّ صَلَاتِي وَنُسُكِي وَمَحْيَايَ وَمَمَاتِي لِلَّهِ رَبِّ الْعَالَمِينَ) .. دي فكرة في حد ذاتها .. انت مركز مع ربنا .. مش فارق معاك أحداث الحياة اللي طالعة نازلة دي .. انت رايح له .. و مركز معاه و عينك عليه و عشان كده بيصغر في عنيك كل ما سواه
٧- الفكرة السابعة: خليك دايما جاهز ب concept" حمدك واسترجع"
إوعي تنسي الصبر و الاسترجاع و الاحتساب عند الفقد ..
وَلَنَبْلُوَنَّكُم بِشَيْءٍ مِّنَ الْخَوْفِ وَالْجُوعِ وَنَقْصٍ مِّنَ الْأَمْوَالِ وَالْأَنفُسِ وَالثَّمَرَاتِ ۗ وَبَشِّرِ الصَّابِرِينَ (155)الَّذِينَ إِذَا أَصَابَتْهُم مُّصِيبَةٌ قَالُوا إِنَّا لِلَّهِ وَإِنَّا إِلَيْهِ رَاجِعُونَ (156)أُولَٰئِكَ عَلَيْهِمْ صَلَوَاتٌ مِّن رَّبِّهِمْ وَرَحْمَةٌ ۖ وَأُولَٰئِكَ هُمُ الْمُهْتَدُونَ (157)
احنا بنقول "إنا لله وإنا إليه راجعون " في الموت بس .. لا أي مصيبه ينفع فيها .. حتي لو فقدت القلم الرصاص بتاعك..
بس تأملوها كده .. إنا .. لله ... و إنا ... إليه .. راجعون ..
يعني انت فقدت فقد مؤقت .. قريب هترجع لربنا و هتلاقي كل اللي ضاع .. متزعلش🙂
٨ - الفكرة الثامنة : شكر النعمة هو أفضل وسيلة للحفاظ عليها .. و الشكر ليس قولا فقط بل عمل كمان.. (اعْمَلُوا آلَ دَاوُودَ شُكْرًا ۚ وَقَلِيلٌ مِّنْ عِبَادِيَ الشَّكُورُ) .. كن من هؤلاء القليل .. ده مش بس هتحافظ عليها ..ده انت هتزودها .. (وَإِذْ تَأَذَّنَ رَبُّكُمْ لَئِن شَكَرْتُمْ لَأَزِيدَنَّكُمْ ۖ)
٩- الفكرة التاسعة : دايما تعوذ من الفقد
و من الأدعية المأثورة عن الرسول صلى الله عليه وسلم
(اللَّهُمَّ إِنِّي أَعُوذُ بِكَ مِنْ زَوَالِ نِعْمَتِكَ، وَتَحَوُّلِ عَافِيَتِكَ، وَفُجَاءَةِ نِقْمَتِكَ
١٠ - الفكرة العاشرة:.........................................................................
.........................................................................
أكمل ..
هأسيب لكل واحد يقرأ هذا البوست أن يضع الفكرة العاشرة في تعليق (إن أراد) .. فنصف رأيك في رأس أخيك .. و ربما يكون عند حد أفكار تساعدني علي مواجهة الفقد و تساعد من يقرأ هذا البوست .. كيف تواجه الفقد ؟؟
معلش استحملوني في بوست النكد ده 😕
البوست ده أنا بأقوي به نفسي قبلكم و الله .. ربنا يرزقنا الإخلاص في القول والعمل
